Årets resultat gjev ein driftsmargin på 2,4 %. Det er betre enn den generelle anbefalinga på 1,75 % i for kommunesektoren. Høgare driftsmargin er derimot naudsynt for å møte det sjølvpålagte kravet om eigenfinansiering av investeringar.
Etter at Hemsedal Energi selde kundelista til Wattn i februar 2025 som et ledd i omstruktureringa etter fusjon med Vidju i 2024, fekk kommunen som eigar eit utbyte på kr 7 mill. Det gjorde godt for kommunekassa etter nedgang i skatteinntektene som følgje av nytt inntektssystem, og eit år med auke i pensjonskostnadar og høg lønsvekst.
Kommunen er i omstilling, og har klart å halde kostnadsutviklinga for kjøp av varer og tenester nede. Denne omstillinga held fram i 2026, og er heilt nødvendig for å utvikla gode tenester med knappare ressursar enn tidlegare år.
Lågare sjukefråvær enn tidlegare påverkar resultatet positivt gjennom mindre vikarutgifter og godt arbeidsmiljø.
Investeringar i varige driftsmidlar på 72,5 mill. i 2025 vitnar om høg aktivitet i kommunen. Nytt vassbehandlingsanlegg vart tatt i bruk og større delar av ledningsnettet vart skifta ut. Samstundes vart arbeidet med nye Ulsåk barnehage starta.
26,9 mill. er overført til investeringar i 2025 for å redusere låneopptaket og halde gjeldsgraden nede. Gjeldsgraden, måltalet på netto lånegjeld i prosent av driftsinntekter, går ned frå 76,2 % i 2024 til 74,0 % i 2025. Fleire investeringar står derimot for tur, og kommunen må førebu seg på ny auke i gjeldsgraden i åra som kjem.
Årets disponeringar reduserer kommunen sitt disposisjonsfond med 14 mill. til 51,4 mill. (11,8 % av sum driftsinntekter). Disposisjonsfondet skal ruste kommunen for mellombels svingingar i økonomien. Trass nedgang, ligg disposisjonsfondet godt over dei nye anbefalinga om at kommunane i gjennomsnitt bør ha et disposisjonsfond på om lag 5 %.[i] Det vitnar om at Hemsedal kommune framleis er godt økonomisk stilt. , og har handlingsrom til å jobbe vidare med omstilling .
Årsrekneskapen er sendt til Viken Kommunerevisjon for revisjon. Tala vil bli presentert meir inngåande på politisk arbeidsdag 25. mars, medan endeleg årsmelding ferdigstillast 31. mars. Vidare skal saken etter planen handsamast i kontrollutvalet, formannskapet 12. mai og kommunestyret 27. mai.
Lenke til årsrekneskapen: https://pub.framsikt.net/2025/hemsedal/mr-202512-rekneskap_2025