Prioritering næringsarbeid

Hemsedal kommune har i vedteke kommuneplanen, - samfunnsdelen som mål å prioritere næringsarbeid med vekt på nyetablering og knoppskyting i etablerte verksemder.  Kunnskapsbasert- og kreative næringar er i denne samanheng eit særskilt satsingsområde.

Mangel på kontorplass ein hemsko for vekst og tilflytting

I Hemsedal er det knapt nok kontor å oppdrive, og dei som er ledige er ikkje nødvendigvis i storleik eller lokalisering eigna for vekst og utvikling. Me veit samstundes at fleire sit på heimekontor grunna manglande tilbod. Kommunen mister også mogelege tilflyttarar som kan tenke seg å ta med jobben, eller etablere avd.kontor i bygda.

Spørsmålet er korleis kommunen kan bidra til å fremje eit miljø for kunnskapsbaserte næringar utover å yte næringsstønad til kvar einskild næringsutøvar/ etablerar i samband med etablering.

Eit felles kontor- og utviklingsmiljø for kunnskapsbaserte næringar kallast ofte næringshage. Her er det tilbod om infrastruktur (IKT, breiband, felles resepsjon), og synergi i form av felles profilering eller marknadsføring samt enklare tilgang til nye marknader. Verksemdene i ein næringshage representerer i seg sjølv eit stort nettverk som kan vere interessant for andre leigetakarar. For nyetablerarar vert ofte slike miljø eit springbrett ved å vere ein del av eit større fagmiljø.

Næringshage

Det som skil ein næringshage frå eit felles kontormiljø er at dei ofte inneheld tilbod om ein utviklingsressurs (ein tilretteleggjar, - koblingsboks med kunnskap, tilgang på kapital og marknad som syter for felles profilering og kompetansefremjande tilbod).

I Trøim sentrum finn ein både bygningsmasse og areal som kan ha potensial til å utvikle seg til ein næringshage. Næringsareal på Svøo kan også egne seg for dette.

Formannskapet vedtok i møte 22. mars å starte ei kartlegging: 

• av grunneigarar/ eigedomsutviklarar som er vuljuge til å leggje fram eigedomstilbod som tilfredsstillar dei krav kommunen set for ein næringshage. Slik som storleik, krav til fellesareal, i kva grad eigedomsutviklar sjølv ønskjer å leggje til rette for eit slikt miljø m.m.
• av etterspurnaden etter kontorlokalar, altså kven kan tenkje seg å leige, type verksemd, kor mykje og kva for type areal som vert etterspurt, (kontor, lager, krav til fellesareal etc.) og krav til fasilitetar.

Med bakgrunn i nemnde kartlegging vil kommunen ta stilling til kva slags rolle kommunen  ønskjer å spele for å fremje etablering av eit attraktivt kontormiljø – anten ved sjølv å leige eit større areal for framleige, eller for ein tidsavgrensa periode subsidiere leigekostnadar for leigetakarar.  

Ønskjer du å bidra til utvikling av eit slikt utviklingsmiljø, eller etterspør du kontorareal – ta kontakt med Ola K. Frogner, på e-post ola.frogner@hemsedal.kommune.no for nærmare informasjon og registrering.